Maanagïerten mieriesoejkesje

Maanagïerte edtja govlesadtemem jïh gïelem eevtjedh

Maanagïerte edtja voerkes årrodh govlesadteme jïh gïele tsevtsieh jïh tsevtsiesuvvieh gaajhkh bieleste maanaj evtiedimmesne. Dialogen jïh ektiedimmien tjïrrh edtja maanide dåarjodh govlesadtedh, meatan, goltelidh, guarkedh jïh mïelh sjugniedidh. Maanagïerte edtja jååhkesjidh jïh viertiestidh maanaj ovmessie gïelh jïh govlesadtemevåajnoeh, dan nuelesne væhtagïele. Gaajhkh maanah edtjieh hijven gïeleskreejrehtimmiem åadtjodh maanagïerteaarkebiejjien tjïrrh, jïh gaajhkh maanah edtjieh meatan darjoeminie mah govlesadtemem jïh elliesvoetegïeleevtiedimmiem skreejredh. Maanagïertine saemien maanide saemien dajvine edtja maanagïerte maanaj saemiengïeleldh maahtoem skreejredh.

Barkijh edtjieh

  • maanaj ovmessie verbaale jïh non-verbaale jiehtegh jååhkesjidh jïh vaestiedidh jïh daej gïeleevtiedimmiem dåarjodh
  • maanaj verbaale jïh non-verbaale govlesadtemem skreejredh jïh sjïehteladtedh gaajhkh maanah leah meatan ektievoetesne jïh soptsestallemisnie
  • hoksedh gaajhkh maanah jeereldihkie jïh hijven dååjrehtimmieh åadtjoeh gïelem nuhtjedh goh akte dïrrege govlesadtemasse, goh dïrrege ussjedæmman jïh mejnie jïjtsh åssjaldahkh jïh domtesh buakta
  • voerkes årrodh mah råållah utnieh goh åvteguvvieh gïelese jïh bealjijes årrodh govlesadtemisnie gaajhki maanajgujmie
  • maanaj govlesadtemem jïh gïelem gïehtjedidh jïh maanah vueptiestidh jïh dåarjoehtidh mah ovmessie tsagkesh govlesadtemisnie utnieh, mah eah jïjnjem soptsesth, jallh seassoehkåbpoe gïeleevtiedimmiem utnieh
  • viehkiehtidh gïelen gellievoetem ræjhkoesvoetem sjædta abpe maanadåehkesne, jienebegïelen maanah dåarjoehtidh dej jïjtse ietniegïelem soptsestidh jïh seamma tïjjen maanaj daaroen-/saemiengïelen maahtoem eadtjohkelaakan eevtjedh jïh evtiedidh

Govlesadteme, gïele jïh teekste

Barkoen tjïrrh faagesuerkine edtja maanagïerte meatan maanah åadtjoeh daej gïelegoerkesem, gïelemaahtoem jïh gellievoeten govlesadtemevuekieh goe rehtidh jïh evtiedidh. Maanagïertesne edtjieh maanah ovmessie gïelh, gïelehammoeh jïh smaarehtjïerth dåastodh rijmi, raajroej, laavlomi, litteratuvri jïh tjaalegi tjïrrh daaletjen jïh dovletjen. Maanagïerte edtja meatan maanah gïeline, symboligujmie jïh tjaaleginie stååkedidh jïh gïeleldh tjetskehkevoetem, goerkesem jïh evtiedimmiem eevtjedh. Maanagïertesne edtjieh maanah nuepiem åadtjodh ovmessie leerehtimmievuekieh dååjredh tjaalegijstie jïh soptsesijstie, mah gaaltijinie estetihkeles dååjresidie, maahtose, ussjedallemidie jïh dåastoemidie gïeline jïh kultuvrine. Barkijh edtjieh bööredh dovne njaalmeldh jïh tjaaleldh gïelem goerehtidh.

Barkoen tjïrrh govlesadteminie, gïeline jïh teekstigujmie edtja maanagïerte meatan årrodh guktie maanah

  • Jïjtsh domtesh, åssjaldahkh, vuajnoeh jïh dååjresh buektieh ovmessie vuekine • gïelem utnedh gosse ektiedimmieh sjugniedieh, stååkedieh jïh dïrreginie ovvaantoeh luetieh
  • dej dïejvesegoerkesem vijriedieh jïh jeerehts baakoeveahkam nuhtjieh
  • baakojne, tjoejenassine, rijmine jïh raajroejgujmie stååkedieh, improviseradieh jïh voejhkelieh
  • gellievoeten heamturh, soptsesh, vaajesh jïh soptsestimmiehammoeh dåastoeh
  • tjetskehkevoetem jïh aavoem dååjroeh reegkesgïelelohkeminie, soptsesteminie, laavloeminie jïh soptsestalleminie
  • ovmessie tjaaleldhgïelehammoeh goerehtieh jïh dåårjehtieh goh låssastjaeleme, guvviedimmie jïh bokstaavh, lohkeme- jïh tjaelemedarjomi tjïrrh

Barkijh edtjieh

  •  jeerehts gïelebyjresem sjugniedidh gusnie maanah nuepiem åadtjoeh aavoedidh gåessie mubpiejgujmie gïelem nuhtjieh jïh govlesedtieh
  • gïeleldh jïh kultuvredh gellievoetem vååjnesasse bïejedh, maanaj ovmessie kulturellen hammoeh jïh identiteeth dåarjodh jïh gellievoetem evtiedidh govlesadtemisnie, gïeligujmie jïh jeatjah hammojne
  • ovmessie soptsestallemidie bööredh gusnie maanah nuepiem åadtjoeh soptsestidh, funterdidh, ussjedidh jïh gihtjedh
  • maanide madtjeldehtedh hæhtadidh jïh gïeline, tjoejine, rijmine jïh jievkehtimmine stååkedidh
  • maanaj stååkedimmiem jïh goerehtimmiem tjaaleldhgïeleste dåarjodh
  • jeerehts buektemehammoeh nuhtjedh jïh gellieh gærjah, laavlomh, guvvieh jïh hammoeh faaledh
  • gïeleskreejreme darjomh sjugniedidh gusnie gaajhkh maanah maehtieh meatan årrodh

https://www.udir.no/laring-og-trivsel/rammeplan/